സൂത്രം

രണ്ടുപേർ
എന്റെ മുറിയിലേക്ക് കടന്ന് വാതിലടച്ചു
അതിലൊരുവൻ
എന്റെ കിടക്കയിലിരുന്ന്
വെള്ളക്കടലാസിൽ വരഞ്ഞുകൊണ്ടിരുന്നു
മറ്റവൻ കറവക്കാരന്റെ മുഖഭാവത്തോടെ
മൂക്ക് ചൊറിഞ്ഞുകൊണ്ടിരുന്നു.

രണ്ടുപേർക്കിടയിൽ വിയർത്തൊലിച്ച്
ഞാൻ നിശബ്ദനായി നിന്നപ്പോൾ
ചെറിയൊരു പുഞ്ചിരിയോടെ
അവരെന്നോട് ഇരിക്കാൻ ആവശ്യപ്പെട്ടു.
തിളച്ച് തെറിച്ച തുള്ളിപോലെ നിശബ്ദമായി
അവരെ നോക്കിയിരുന്നിട്ട്
ഞാൻ നിലവിളിച്ചുകൊണ്ട്
അതിലൊരുവന്റെ അരയിൽ നിന്നും
കത്തിവലിച്ചെടുത്ത് മറ്റവനെ കുത്തിക്കൊന്ന്
ഇറങ്ങിയോടി
ഹാ കാണേണ്ടതായിരുന്നു
മരിച്ചവൻ വരച്ചുകൊണ്ടിരുന്ന
വെള്ളക്കടലാസിലേക്ക് നോക്കി
തിളങ്ങുന്ന മുഖവുമായി
വിയർത്ത് കുളിച്ചിരിക്കുന്നവനെ.