മുറിവുകൾ

തലയ്ക്ക്‌ മുകളിൽ കറങ്ങിക്കൊണ്ടിരിക്കുന്ന
ഫാനായി സ്വപ്നം കവർന്നെടുക്കുമ്പോൾ
കറങ്ങിക്കൊണ്ടിരിക്കുന്ന
അനേകം ചിറകുകൾ മുളയ്ക്കുന്നു.
മുറിവുകളുണ്ടാക്കിയ വേദനയിൽ
തളർന്നുറങ്ങുന്നവന്റെ തലയ്ക്ക്‌ മുകളിൽ ഞാൻ.

അനേകം ചിറകുകൾ
അവന്റെ മുറിവുകളിലൂടെ
അവന്റെ ചരിത്രത്തിലേക്ക്‌ വഴിതെറ്റുന്നു,
പൊടുന്നനെ
ഗർഭപാത്രത്തിന്റെ കുരുക്കുകൾ ഭേദിച്ച്‌
കുട്ടിയുടെ കരച്ചിൽ

എന്റെ മുറിവുകൾക്കപ്പുറത്തുനിന്ന്
എന്റെ ചിറകുകൾക്കിപ്പുറത്തേക്ക്‌
തീരെ വീതിയില്ലാത്ത
ഒരു വരാന്തയുണ്ട്‌,
അതിലൂടെ
ഞാനവന്റെ ഓർമ്മയിലേക്ക്‌ വീശിക്കൊണ്ടിരിക്കുന്നു.

കാറ്റ്‌ വരാന്തയിലൂടെ ഓടിയോടി
ഇടവഴിയിലൂടെ
മുറിവുകൾ ഉണങ്ങാനിടുന്ന തടാകക്കരയിലെത്തുന്നു.

ഞാൻ ഫാനായി കറങ്ങിക്കൊണ്ടിരിക്കുന്ന സുഖത്തിൽ
മുറിവുകളുണ്ടാക്കിയ വേദനയിൽ തളർന്നുറങ്ങുന്നവൻ
മുറിവുകൾ ഉണങ്ങാനിടുന്ന
തടാകക്കരയിൽ നിന്നും അവൾക്കായി
ഉമ്മകൾ പൊതിഞ്ഞയക്കുന്ന സ്വപ്നം കാണുന്നു.

രാത്രി രണ്ടരയ്ക്ക്‌
അവസാനത്തെ ബസ്സും വന്നുകഴിയുമ്പോൾ
പകൽ യാത്രയായ വഴിയിലൂടെ
നിശബ്ദതയും കുറച്ചുനേരത്തേക്ക്‌ യാത്രയാവാറുണ്ട്‌
അവന്റെ ചരിത്രത്തിലൂടെ
എന്റെ ചിറകുകൾ
യാത്രക്കാരുടെ ഉറക്കം ചുമലിലേറ്റി
കൂലി വാങ്ങുന്നു.

അവസാനത്തെ
അവസാനത്തെ
അവന്റെ മുറിവും ഉണങ്ങിക്കഴിയുമ്പോൾ
എന്റെ ചിറകുകൾ ഉറങ്ങുന്നു
തലയ്ക്ക്‌ മുകളിൽ കറങ്ങിക്കൊണ്ടിരിക്കുന്ന ഫാൻ നിലയ്ക്കുന്നു.
ഉഷ്ണം കാരണം ഞാൻ ഉണരുന്നു.